တူချယ်ကို စည်းကမ်း လိုက်နာဖို့ သတိပေးလိုက်တဲ့ ဘေယန်မြူးနစ် (ဘွန်ဒက်စ်လီဂါ သတင်းများ)

ဒီတစ်ခါ မှာတော့ စက်တင်ဘာလ ၁၃ ရက်နေ့ အထိ ရရှိထားသမျှ ဘွန်ဒက်စ်လီဂါ သတင်းတွေကို ဖော်ပြပေးသွားမှာ ဖြစ်ပါတယ်။

တူချယ်ကို စည်းကမ်း လိုက်နာဖို့ သတိပေးလိုက်တဲ့ ဘေယန်မြူးနစ်

ဘေယန်မြူးနစ်ရဲ့ ထိပ်သီးပိုင်း တာဝန်ရှိသူတွေဟာ နည်းပြ သောမတ်စ် တူချယ်ကို အသင်းရဲ့ လူစာရင်းနဲ့ ပတ်သက်ပြီး စောဒက မတက်ဖို့နဲ့ စိတ်ခံစားချက်ကို ထိန်းချုပ်ဖို့ စည်းကမ်း သတ်မှတ်လိုက်ကြောင်း သိရပါတယ်။

ပြီးခဲ့တဲ့နွေရာသီ အပြောင်းအရွှေ့မှာ ဘွန်ဒက်စ်လီဂါ ဘီလူးကြီးက ဟယ်ရီကိန်းကို ခေါ်ယူနိုင်ခဲ့သည့်တိုင် တူချယ်က အသင်းရဲ့ ကစားသမားစာရင်းကို ကျေနပ်အားရမှု မရှိခဲ့ပါဘူး။ အဲ့ဒါကြောင့်လည်း ပြီးခဲ့တဲ့ သတင်းစာ ရှင်းလင်းပွဲတွေမှာ တူချယ်က လူစာရင်းနဲ့ ပတ်သက်လို့ ငြီးတွားခဲ့ပြီး ဘေယန်မြူးနစ် တာဝန်ရှိသူတွေ အတွက် စိတ်ပျက်စရာ ဖြစ်ခဲ့ပါတယ်။

ဘွန်ဒက်စ်လီဂါ အသင်းကြီးရဲ့ ထိပ်တန်း တာဝန်ရှိသူအချို့ဟာ တူဟယ်လ်ရဲ့ အပြုအမူ၊ အပြောအဆိုတွေကို သဘောကျ နှစ်သက်ခြင်း မရှိဘဲ လက်ရှိမှာတော့ စည်းကမ်းထုတ်ပြီး တားမြစ်လိုက်တာပါ။ ဒါ့အပြင် နှစ်ဦးနှစ်ဖက် လျှို့ဝှက် အစည်းအဝေး ပြုလုပ်ခဲ့ပြီး ပြီးခဲ့တဲ့ နွေရာသီ အပြောင်းအရွှေ့မှာ အားလုံးက အမှားအယွင်းတွေ ရှိခဲ့ကြောင်းကိုလည်း ဝန်ခံ တောင်းပန်ခဲ့တယ်လို့ သိရပါတယ်။

ဒဏ်ရာပြဿနာတွေနဲ့ ရင်ဆိုင်နေရတဲ့ လိုက်ပ်ဇစ်

ဘွန်ဒက်စ်လီဂါ ကလပ် လိုက်ပ်ဇစ်ဟာ အသင်းခေါင်းဆောင် ဝီလီ အော်ဘန်၊ တိုက်စစ် ကစားသမား ဒန်နီ အော်လမို တို့ကို ဒဏ်ရာပြဿနာကြောင့် ဆုံးရှုံးရဖွယ် ရှိနေပါတယ်။ ဒီကစားသမား နှစ်ယောက်လုံးဟာ လက်ရှိနိုင်ငံတကာ ရက်သတ္တပတ်မှာ ဒူးဒဏ်ရာ အသီးသီး ရရှိခဲ့ပြီး ဒီသတင်း ကိုလည်း လိုက်ပ်ဇစ် ဘက်က တရားဝင် အတည်ပြု ကြေညာခဲ့ပါတယ်။

အော်လမိုက ရက်သတ္တပတ် အနည်းငယ်သာ အနားယူရမှာ ဖြစ်ပေမယ့် အော်ဘန် ကတော့ အနည်းဆုံး (၂) လကျော် ကြာအောင် အနားယူရမယ်လို့ သိရပါတယ်။ အော်လမိုဟာ ပြီးခဲ့တဲ့ ရက်ပိုင်းကတည်းက ညာဘက်ဒူးဒဏ်ရာ ပြဿနာကြောင့် စပိန်လက်ရွေးစင် အသင်း ကနေ ပြန်လည် နှုတ်ထွက်လာခဲ့တာ ဖြစ်ပြီး ဆေးစစ်မှုတွေ ပြုလုပ်ပြီးတဲ့ နောက်မှာတော့ အခုလိုမျိုးပဲ အနားယူရဖို့ သေချာသွားခဲ့တာပါ။

အော်ဘန် ကလည်း ညာဘက်ဒူးဒဏ်ရာပဲ ရရှိခဲ့တာ ဖြစ်ပြီး ချန်ပီယံလိဂ်ပွဲတွေ ကစားရတော့မယ့် လိုက်ပ်ဇစ် အတွက်တော့ အသင်းရဲ့ အဓိက, ကစားသမား နှစ်ယောက်ရဲ့ ဒဏ်ရာပြဿနာက ကြီးမားတဲ့ ထိုးနှက်ချက်တစ်ခု ဖြစ်ခဲ့ပါတယ်။

ယူနိုက်တက်ရဲ့ စိတ်ဝင်စားခြင်းကို ခံနေရတဲ့ ဘေယန်မြူးနစ် ကြယ်ပွင့်

မန်ချက်စတာယူနိုက်တက်ဟာ ဘွန်ဒက်စ်လီဂါ ထိပ်သီး ကလပ် ဘေယန်မြူးနစ်ရဲ့ တိုက်စစ်ကစားသမား ဆာ့ဂျ် ဂနာဘရီကို ခေါ်ယူဖို့ အတွက် စောင့်ကြည့်လာခဲ့ကြောင်း သိရပါတယ်။ ယူနိုက်တက်ဟာ လက်ရှိမှာ အသင်းရဲ့ အဓိက ညာတောင်ပံကစားသမား အန်တိုနီကို ကွင်းပြင်ပ ပြဿနာတွေကြောင့် လက်လွှတ်ထားရပါတယ်။

ဒါ့အပြင် ဂရင်းဝုဒ် ကိုလည်း မကြာခင်ကမှ အသင်း ကနေ ထွက်ခွာခွင့်ပြုထားတာကြောင့် လာမယ့် အပြောင်းအရွှေ့မှာ ညာတောင်ပံနေရာ အတွက် သေချာပေါက် ပြင်ဆင် အားဖြည့်ဖို့ လိုအပ်နေပါတယ်။ အဲ့ဒါကြောင့်လည်း အခုလိုမျိုး ဂနာဘရီကို ခေါ်ယူဖို့ စိတ်ဝင်စားလာတာ ဖြစ်ပြီး ဒီကစားသမား အတွက် ပြောင်းရွှေ့ကြေး ယူရိုသန်း (၆၀) အသုံးပြုရဖွယ် ရှိနေပါတယ်။

ဂနာဘရီဟာ အာဆင်နယ် ကစားသမားဟောင်း တစ်ဦး ဖြစ်ပြီး အင်္ဂလန်ရဲ့ ရေခံ၊ မြေခံနဲ့ ရင်းနှီး အသားကျပြီးသား ကစားသမား တစ်ယောက်ပါ။ ဒါ့အပြင် တိုက်စစ် နေရာစုံမှာ ကစားနိုင်တဲ့ အချက်ကလည်း ဂနာဘရီရဲ့ အားသာချက် တစ်ခု ဖြစ်ပြီး ယူနိုက်တက် ကတော့ ဒီကစားသမားကို စတင် စောင့်ကြည့်နေပြီလည်း ဖြစ်ပါတယ်။

 

●●●

နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS

အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်

ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , တွစ်တာ , အင်စတာဂရမ် and ယူကျု့ဘ်.