ခရစ္စတယ်ပဲလေ့စ် ၀-၁ မန်ချက်စတာစီးတီး
မနေ့ညက ကစားခဲ့တဲ့ ပရီးမီးယားလိဂ် ပွဲစဉ် (၂၇) မှာတော့ နောက်ကျပွဲ မှာတော့ မန်ချက်စတာစီးတီးက အဝေးကွင်းမှာ ဟာလန်းရဲ့ တစ်လုံးတည်းသော ပင်နယ်တီ သွင်းဂိုးနဲ့ ခရစ္စတယ်ပဲလေ့စ်ကို အနိုင်ရသွားခဲ့ပါတယ်။ မျှော်လင့်ထားတဲ့ အတိုင်းပဲ အိမ်ကွင်းမှာ ဆိုရင် အသင်းကြီးတွေကို ဒုက္ခပေးလေ့ ရှိတဲ့ ပဲလေ့စ်ကို မန်စီးတီးတို့ ခက်ခက်ခဲခဲ အနိုင်ယူခဲ့ရတာ ဖြစ်ပါတယ်။
ပွဲစဉ်အကျဉ်း
နှစ်သင်းစလုံး အတောင့်တင်းဆုံး လူစာရင်း ကိုယ်စီနဲ့ ပွဲထွက်လာခဲ့ကြပြီး ပဲလေ့စ် ဘက်မှာ ဇာဟာ၊ အာယူး၊ အိုလစ်၊ လိုကွန်ညာတို့ ပါဝင်ခဲ့ပါတယ်။ မန်စီးတီး ကတော့ ထုံးစံ အတိုင်း တိုက်စစ်မှာ အာလင်း ဟာလန်း တစ်ဦးတည်းကို အထောင် ကစားစေပြီး တောင်ပံ နှစ်ဖက်မှာ ဂရီးလစ်ရှ်နဲ့ ဖိုဒန် တို့ကို ပွဲထုတ်ခဲ့ပါတယ်။ မန်စီးတီး တို့ပဲ ပွဲစကတည်းက ကစားကွက် အသာစီးရယူ ကစားနိုင်ခဲ့ပြီး ဂိုးပေါက် ခြိမ်းခြောက်မှုတွေလည်း အကြိမ်ကြိမ် ပြုလုပ်နိုင်ခဲ့ပါတယ်။ ဒါပေမယ့်လည်း ဟာလန်းရဲ့ အပိုင်ကန်ချက် တချို့ ဂိုးပေါက်နဲ့ လွဲချော်နေခဲ့သလို ရိုဒရီရဲ့ ကန်ချက်ကို ဂွိုက်တာ ကာကွယ်နိုင်ခဲ့ပြီး ဂရီးလစ်ရှ်ရဲ့ ကန်ချက် ကတော့ ဂိုးဘေး ကနေ ကပ်ထွက်သွားလို့ ၀-၀ နဲ့ပဲ ပထမပိုင်း ပြီးခဲ့ပါတယ်။
ဒုတိယပိုင်းမှာ ဖိုဒန် အစား အဲလ်ဗာရက်ဇ်ကို ထည့်ပြီး တိုက်စစ်မြှင့်ခဲ့ပေမယ့် မန်စီးတီးတို့ ပဲလေ့စ် နောက်တန်းနဲ့ ဂိုးသမား ဂွိုက်တာကို ကျော်ဖြတ်ဖို့ ခက်ခဲနေခဲ့ပါတယ်။ ဒီလိုနဲ့ ပွဲချိန် မိနစ် ၈၀ နီးပါး အရောက်မှာတော့ ဧည့်သည် အသင်း ဂိုးရဖို့ အကြောင်းဖန်လာခဲ့ပါတယ်။ ဧရိယာထဲမှာ ပဲလေ့စ် ကစားသမား အိုလစ်က ဂွန်ဒိုအန်ကို ခပ်ကြမ်းကြမ်း ဖျက်ထုတ်မိတာကြောင့် ကွင်းလယ်ဒိုင်က မန်စီးတီးကို ပင်နယ်တီပေးခဲ့ပြီး အာလင်း ဟာလန်းက အမှားအယွင်း မရှိ ကန်သွင်းခဲ့ပါတယ်။ လက်ကျန် မိနစ်တွေ မှာလည်း မန်စီးတီး ကပဲ ပွဲကို ဆက်လက် ထိန်းချုပ်နိုင်ခဲ့တာကြောင့် ၀-၁ ရလဒ်နဲ့ပဲ ပွဲပြီးဆုံးခဲ့ပါတယ်။
ပွဲပြီးသုံးသပ်ချက်
နောက်ပိုင်း ပွဲတွေမှာ တောက်လျောက် ရလဒ်တွေ ကောင်းနေတဲ့ မန်စီးတီးတို့ ပရီးမီးယားလိဂ် ဇယားထိပ်က အာဆင်နယ်ကို ဆက်လက် ဖိအားပေးနိုင်ဖို့ ပဲလေ့စ်ကို လူစုံထုတ်ပြီး ရင်ဆိုင်ခဲ့တာ ဖြစ်ပါတယ်။ နောက်နှစ်ရက် နေရင် လိုက်ပ်ဇစ်နဲ့ အရေးကြီးတဲ့ ချန်ပီယံလိဂ် ပွဲကစားရမှာ ဖြစ်ပေမယ့် ပပ်ရဲ့ အသင်းက အပြည့်အဝ အားစိုက်သွားခဲ့ပါတယ်။
ပဲလေ့စ်နဲ့ ဖြစ်လို့ သတိကြီးကြီးထား ကစားသွားခဲ့ရပေမယ့် မန်စီးတီးတို့ ဂိုးရဖို့ပဲ ခက်ခဲခဲ့ပါတယ်။ တစ်ပွဲလုံး လွှမ်းမိုး ကစားနိုင်ခဲ့ပြီး ပြိုင်ဘက် ဂိုးပေါက်ကို အကြိမ်ကြိမ် ခြိမ်းခြောက်နိုင်ခဲ့ပေမယ့် အဆုံးသတ် အားနည်းမှုကြောင့် သွင်းဂိုး ၁ ဂိုးတည်းနဲ့ ကျေနပ်ခဲ့ရတာ ဖြစ်ပါတယ်။ ဒါတောင် ပင်နယ်တီ ရခဲ့လို့ ဖြစ်ပါတယ်။ ဟာလန်း ကတော့ ဒီရာသီ ပရီးမီးယားလိဂ်မှာ သွင်းဂိုး ၂၈ ဂိုး အထိ ရရှိသွားခဲ့ပြီး ပြိုင်ပွဲစုံ ဆိုရင်တော့ ၃၄ ဂိုး အထိ သွင်းယူထားနိုင်ခဲ့ပြီ ဖြစ်ပါတယ်။
အနိုင်ရခဲ့တဲ့ မန်စီးတီးတို့ အာဆင်နယ် ထက် တစ်ပွဲပို ကစားပြီး ၂ မှတ် အကွာနဲ့ ဆက်လက် ဖိအားပေးနိုင်ခဲ့သလို ပဲလေ့စ် ကတော့ အဆင့် ၁၂ နေရာမှာပဲ ဆက်ရှိနေခဲ့ပါတယ်။ ဒါပေမယ့်လည်း ပက်ထရစ် ဗီအဲရာရဲ့ အသင်းက ပရီးမီးယားလိဂ် နိုင်ပွဲ ပျောက်နေခဲ့တာ ၁၀ ပွဲ အထိ ရှိသွားခဲ့ပြီ ဖြစ်ပါတယ်။
လာမယ့် ပွဲစဉ်များ
ခရစ္စတယ်ပဲလေ့စ်တို့ လာမယ့် ကြာဿပတေးနေ့မှာ ဘရိုက်တန်နဲ့ ပရီးမီးယားလိဂ် ပွဲကျန် ကစားရဖို့ ရှိပြီး မန်စီးတီး ကတော့ ကြားရက်မှာ လိုက်ပ်ဇစ်နဲ့ ချန်ပီယံလိဂ် (၁၆) သင်း အဆင့် ရှုံးထွက် ဒုတိယအကျော့ ပွဲစဉ် ကစားရမှာ ဖြစ်ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , တွစ်တာ , အင်စတာဂရမ် and ယူကျု့ဘ်.
