အာဆင်နယ်ကို ဖိအား ကိုယ်စီ ပေးလိုက်တဲ့ မန်ချက်စတာ နှစ်သင်း၊ ဟာလန်းရဲ့ ကြံ့ခိုင်မှု ပြသနာကြောင့် အခက်တွေ့နေတဲ့ မန်စီးတီး စတာတွေ အပါအဝင် ဖေဖော်ဝါရီလ ၁၃ ရက်နေ့ ညနေခင်း အထိ ရရှိထားတဲ့ ပရီးမီးယားလိဂ် သတင်းတွေကို ဖော်ပြပေးသွားမှာ ဖြစ်ပါတယ်။
အာဆင်နယ်ကို ဖိအား ကိုယ်စီ ပေးလိုက်တဲ့ မန်ချက်စတာ နှစ်သင်း
မနေ့ညက ကစားခဲ့တဲ့ အင်္ဂလန် ပရီးမီးယားလိဂ် ပွဲတွေ မှာတော့ မန်ချက်စတာယူနိူက်တက်အသင်းက အဝေးကွင်းမှာ လိဒ်စ်ယူနိုက်တက်၊ မန်ချက်စတာစီးတီးက အိမ်ကွင်းမှာ အက်စတွန်ဗီလာ တို့ကို ဂိုးပြတ် နိုင်ပွဲတွေ အသီးသီး ရရှိသွားခဲ့ကြပါတယ်။ ဒီနိုင်ပွဲတွေနဲ့ အတူ နှစ်သင်းစလုံးက ဇယားထိပ်ဆုံးက အာဆင်နယ်ကို ဖိအားပေးနိုင်ခဲ့ကြပြီ ဖြစ်ပါတယ်။
မန်စီးတီး ကတော့ ပထမပိုင်း မှာကတည်းက ၃ ဂိုးအထိသွင်းပြီး ဗီလာကို အနိုင်ရခဲ့တာပါ။ ရိုဒရီ၊ ဂန်ဒိုဂန်နဲ့ မာရက်ဇ်တို့က သွင်းယူခဲ့ကြပြီး ဒီနိုင်ပွဲကြောင့် မန်စီးတီးဟာ အာဆင်နယ်ထက် တပွဲပို ကစားထားပြီး ၃ မှတ်အကွာနဲ့ ဒုတိယနေရာမှာ ရှိနေပါတယ်။ ယူနိုက်တက် ကလည်း ပွဲချိန် နောက်ဆုံး ၁၀ မိနစ် အတွင်း ရက်ရှ်ဖို့ဒ်နဲ့ ဂါနာချို တို့ရဲ့ ဂိုးတွေကြောင့် လိဒ်စ်ကို အနိုင်ရသွားခဲ့တာပါ။
ယူနိုက်တက် ကတော့ အာဆင်နယ်ထက် ၂ ပွဲ ကစားထားကာ ၅ မှတ် အကွာနဲ့ တတိယနေရာမှာ ရှိနေပြီး မန်စီးတီးထက် ၁ပွဲ ပိုကစားထားပြီး ၂ မှတ် အကွာမှာ ရှိနေပါတယ်။ လာမယ့် ကြာသပေတေးနေ့မှာ အာဆင်နယ်နဲ့ မန်စီးတီးတို့ ကစားရမှာ ဖြစ်ပြီး မန်စီးတိးတို့ အနိုင်ရခဲ့မယ် ဆိုရင် အာဆင်နယ်နဲ့ အမှတ်တူ အနေအထားကို ေရာက်ရှိလာတော့မှာဖြစ်ပါတယ်။
ဥရောပရဲ့ အကောင်းဆုံး တိုက်စစ်မှူးလို့ ရက်ရှ်ဖို့ဒ်ကို ချီးကျူးလိုက်တဲ့ တန်ဟက်ဂ်
ပရီးမီးယားလိဂ် ကလပ် မန်ချက်စတာယူနိုက်တက် နည်းပြ အဲရစ်ခ် တန်ဟက်ဂ်က သူ့အသင်းရဲ့ တိုက်စစ်မှူး မားကပ်စ် ရက်ရှ်ဖို့ဒ်ကို ဥရောပရဲ့ အကောင်းဆုံး တိုက်စစ်မှူး တစ်ဦးလို့ ချီးကျူးလိုက်ပါတယ်။ လိဒ်စ်ယူနိုက်တက်နဲ့ ပွဲမှာ ယူနိုက်တက်တို့ ဂိုးရဖို့ လိုအပ်နေခဲ့ပြီး ရက်ရှ်ဖို့ဒ်က မိနစ် ၈၀ မှာ ခေါင်းတိုက် ဂိုးသွင်းယူပေးကာ အသင်းကို ကူညီပေးနိုင်ခဲ့ပြီး အဆုံးအဖြတ် ကစားသမား တစ်ဦးလို ဖြစ်လာနေပါပြီ။
ကမ္ဘာ့ဖလား နောက်ပိုင်း ကစားခဲ့တဲ့ ပြိုင်ပွဲစုံ ၁၅ ပွဲမှာ ရက်ရှ်ဖို့ဒ်က ၁၃ ဂိုးအထိ သွင်းယူပေးထားပြီး ခြေစွမ်းပြနေတာပါ။ အသက် ၂၅ နှစ် အရွယ် အင်္ဂလန် တိုက်စစ်မှူးကို တန်ဟက်ဂ်က တော်တော်လေး သဘောကျနေပြီ ဖြစ်ပြီး ချီးကျူးမှုတွေ ပြုလုပ်ခဲ့သလို ဘယ်လိုတွေ ဆက်လက် ကစားသွားရမလဲ ဆိုတာ ကိုပါ အကြံပေးခဲ့ပါတယ်။
“ သူ့မှာ အရည်အသွေးတွေ အများကြီး ပိုင်ဆိုင်ထားပါတယ်၊ သူသာ ကြိုးစားရင် ဂိုးတွေ ပိုသွင်းလာနိုင်မှာပါ၊ ဘာလို့လဲ ဆိုတော့ သူက ဘယ်ခြေ၊ ညာခြေ၊ ခေါင်းတိုက်ဂိုးတွေ သွင်းယူနိုင်လို့ပါ၊ သူက ဥရောပရဲ့ အကောင်းဆုံး တိုက်စစ်မှူးတွေ ထဲက တဦးပါ၊ ဒါပေမယ့် သူ့ကို ကျနော်တို့ အမြဲတမ်း လှုံ့ဆော်နေရမှာ ဖြစ်ပြီး သူသာ အာရုံစိုက်မှု ပျက်သွားရင် သွင်းဂိုးတွေ ရပ်တန့်သွားလိမ့်မယ်” လို့ တန်ဟက်ဂ်က ပြောဆိုခဲ့ပါတယ်။
ဟာလန်းရဲ့ ကြံ့ခိုင်မှု ပြသနာကြောင့် အခက်တွေ့နေတဲ့ မန်စီးတီး
မန်ချက်စတာစီးတီး တိုက်စစ်မှူး အားလင်း ဟာလန်းဟာ အက်စတွန်ဗီလာနဲ့ ကစားခဲ့တဲ့ မနေ့ညက ပွဲမှာ ပေါင်ခြံ ဒဏ်ရာရရှိသွားခဲ့ပါတယ်။ အဆိုပါ ဒဏ်ရာကြောင့် ဟာလန်းဟာ ဒုတိယပိုင်း အစမှာပဲ လူစားလဲလှယ်ခဲ့ရပြီး အာဆင်နယ်နဲ့ ကစားရမယ့် ကြားရက် ပရီးမီးယားလိဂ် ပွဲစဉ် အမီ ကြံ့ခိုင်မှု ပြည့်၀လာပါ့မလား ဆိုတာကို စိုးရိမ်နေရပြီ ဖြစ်ပါတယ်။
ဒီရာသီမှာ မန်စီးတီး အတွက် ပြိုင်ပွဲစုံ သွင်းဂိုး ၃၁ ဂိုးအထိ ရရှိထားတဲ့ ဟာလန်းသာ မကစားနိုင်ရင် ဂွာဒီယိုလာ အတွက် ခေါင်းခြောက်စရာဖြစ်လာမှာပါ။ သူ့ရဲ့ ကစားသမား ဒဏ်ရာရရှိခဲ့တာ မဟုတ်ဘူးလို့တော့ ဂွာဒီယိုလာက ယုံကြည်နေပြီး စစ်ဆေးမှု ရလဒ်တွေ ထွက်ပေါ်လာပြီးမှသာ အတိအကျ သိနိုင်မယ်လို့လည်း ပွဲအပြီးမှာ ပြောခဲ့ပါတယ်။
“ သူ ဒဏ်ရာ မရှိဘူးလို့ ကျနော် ထင်တယ်၊ မနက်ဖြန်တော့ ကြည့်ရမှာပေါ့၊ အာဆင်နယ်နဲ့ ပွဲအတွက် သူ အသင့်ဖြစ်နေမယ်လို့ မျှော်လင့်ပါတယ်၊ ဒါပေမယ့် သူ အသင့်မဖြစ်ခဲ့ဘူး ဆိုရင် ဒါမှမဟုတ် risk တချို့ ယူရမယ် ဆိုရင်တော့ သူ ကစားပေးနိုင်မှာ မဟုတ်ပါဘူး” လို့ ဂွာဒီယိုလာက ပြောဆိုခဲ့ပါတယ်။ အဆိုပါ ပွဲကတော့ မန်စီးတီး အတွက် အရေးကြီးနေပြီး အာဆင်နယ်နဲ့ အမှတ်တူ အနေအထားကို ရယူနိုင်မယ့် ပွဲလည်း ဖြစ်ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , တွစ်တာ , အင်စတာဂရမ် and ယူကျု့ဘ်.
